ශ්‍රී ලංකා ක්‍රිකට් කණ්ඩායමට නැවත නොපරදින්නට ගුරුකමක් මෙන්න.

විස්සයි විස්ස ලෝක කුසලාන අවසාන තරඟය පරදින ලකුණු හැම පැත්තෙන්ම පෙනෙන්නට පටන් ගනිද්දී මම මේ පරාජයට පලි කවුරුදැයි හිතන්නට පටන් ගත්තා. මාලිංග , ඩිල්ෂාන් , පිට්ටනිය වටේ නටන ගෑණු උදවිය එකින් එක මතකෙට එද්දිම තමයි ඔන්න එතුමාගේ මූණ ටී වී එකෙන් පේන්න පටන් ගත්තේ.

එතුමා මේ ෆයිනල් එකත් බලන්නට ගොහින් හිටියා. තුන්වෙනි පන්තියේ මහජනයාට වගේ ටිකට් ගන්නට මහන්සි වෙන්න ඕනෑ නැති හින්දා උන්නැහේට ඕනෑම මැච් එකක් බලන්නට යන්නට පුලුවන්කම තියනවා. සමහරවිට කලින් ගිය කට කැඩිච්ච කථා වල හැටියටනම් එතුමා ටිකට් අරන් මැච් එක බලන්න හිටියානම් ටිකට් ගන්න වෙයිද කියලනම් තියෙන්නේ සැකයක්. මේ මෙතනත් කියන්න යන්නේ ඔය මැච් එක එතුමා හින්දා පැරදුනා කියලා හෙම නෙවෙයි ඔන්න.ඒක එහෙම නෙවෙයි කියලා ඕනෑම දේශප්‍රේමියෙක් දන්නවා.

අපේ කණ්ඩායමටත් තියෙන්නේ දැන් රටේ ලොකු තැන්වලින් ආදර්ශයට අරගෙන මෙතැනින් ඉදිරියට අනික් තරඟ දිනන සැලැස්මක් හදා ගන්නා එක මෙන්න මේ වගේ. එහෙම නැතුව අරයා බලන්න ආවම පරදිනවා වගේ බොරු දේවල් හිත හිතා හිටියොත් හැමදාම පරදින එක ආයේ සක්කරයටවත් වලක්වන්න බෑ.

1.ක්‍රිකට් කණ්ඩායමට උපදේශකයන් පත් කර ගැනීම.
(පෑඩ් දැමීමට උපදේශක,ග්ලවුස් දැමීමට උපදේශක,බෝල් ගාර්ඩ් දැමීමට උපදේශක වාගේ පට්ටම් 100ක් පමණ සුදුසුය)

2.අම්පයර්ලාගේ ගෙවල් වලට ගල් ගැසීම.
(එතකොට උන්නැහේලා අපේ කණ්ඩායමට විරුද්ධව ඇඟිල්ල උස්සන්නේ නැත.)

3.ප්‍රතිවාදී ප්‍රබල කණ්ඩායම් ඇත්නම් දෙකට තුනට බෙදා දැමීම.
(කොදෙව් A,කොදෙව් B,කොදෙව් C ආදී ලෙස බෙදා දැමූ විට අපට ඔවුන්ගෙන් වෙන තර්ජනය ඉතා අඩු කර ගත හැකිය.)

4.ප්‍රබල කණ්ඩායම් වල නායකයින් මාරු කිරීම.
(ඕස්ට්‍රේලියානු නායක ස්ටීව් හෝප්,ඉන්දියානු නායක රාජිව් භාතියා වැනි මීට පෙර නමවත් අසා නැති විපක්ෂ නායක පන්නයේ නායකයන් පත් කල යුතුය.ඔවුන්ට සදාකල් නායකත්වයේ රැඳී සිටීමට කොන්දේසි විරහිතව සහය පල කල යුතුය)

5.ප්‍රතිවාදී කණ්ඩායම් වලට බොරු කියා රැවට්ටීම.
(විස්සයි විස්ස මැච් එකක අනෙක් කණ්ඩායම පලමුව පන්දුවට පහර දී සියල්ලම දැවී ගියහොත්,මේ ඕවර් 50 මැච් එකක් බව දන්නේ නැද්දයැයි ඔවුන්ට කියා අපි ඕවර් 50ක් පාවිච්චි කර මැච් එක දිනීම වැනි උපක්‍රම )

6.අනෙක් කණ්ඩායම් වල ප්‍රබල ක්‍රීඩකයන්ගේ සාමාන්‍ය ජීවිතයේ ඇතැම් තැන් සොයා ප්‍රසිද්ධ කිරීම.එසේ සොයා ගත නොහැකිනම් නැති දේවල් ඇතිකර ඒවා ප්‍රසිද්ධ කිරීම.
(කෝලි ඉස්කෝලේ යන කාලේ වීරප්පන් එක්ක ආණ්ඩුවට එරෙහිව කුමන්ත්‍රණය කිරීමට කථා කර තිබේ,ෂහීඩ් අෆ්‍රිඩි ඉස්සර ෆාදර් කෙනෙක්,පේන්නේ නැද්ද දැනුත් කතා කරද්දි ඒ ස්ටයිල් එක තියෙන්නේ…….වැනි දේ සුදුසුයි)

7. තරගාවලියේ තරඟ කොටස් වශයෙන් පැවැත්වීම.
(මෙහිදී තරඟ එකවර පවත්වන්නේ නැත.තරගාවලිය අවසාන කිරීමට නියමිත කාලයක් කලින් තීරණය කරන්නේ නැත.ඉන්දියානු කණ්ඩායම දුර්වලතා පෙන්වන කාලයක් බලා ඉන්දියාව සමග වශයෙන් එක එක කාලවලදී තරඟ පවත්වනු ලැබේ…)

8.අනෙක් කණ්ඩායම් වලට ක්‍රීඩකයන් තෝරා ගන්නාතුරු බලාසිට ඔවුන් සල්ලි දී කණ්ඩායමට ක්‍රීඩා නොකිරීමට පොළඹවා ගැනීම.
(තරඟ වදින්නට සූදානම් වන අවසාන මොහොතේදී එවිට ඒ කණ්ඩායම් වලට තමන්ගේ සංචිතයට තෝරා ගත් ක්‍රීඩකයන් අඩුවී ඇති බව දැනගන්නට ලැබීමෙන් මහත් අපහසුතාවයට පත් වීමට සිදුවේ)

මේවා කල නොහැකි වැඩයැයි කිසිවෙක් සිතනවානම් එතුමා මේ උපක්‍රම සාර්ථක කර ගත හැකි කෙටි ක්‍රම අපේ ක්‍රිකට් කණ්ඩායමට කියා දෙනු නොඅනුමානය.
මේවා හරියන බව වරායට නැව් එනවාක් මෙන් ස්ථීරය,ප්‍රත්‍යක්ෂය.

අඩෝ…….. සංගක්කාර .

අත පය හිරිඇර ගන්නට නෙලන්න කෙනෙක් කාලෙකින් හම්බනොවුණු විමලසිරි හිටියේ හරිම අමාරුවෙන්.ඒ විතරක්නම් මදැයි,තමුන්ගේ ආර්‍යාවත්  මෙච්චර කලක් ගෙදරදී විතරක් දාපු වලිය ටික ටික ලෝකෙටම පේන්න දාන්න ගත්තු එක ගැන විමලසිරිගේ හිතට හරිම අමාරුයි.ඉස්සර රතු පාටියේ ඉන්නැද්දී කොච්චරනම් ලෝකේ පෙරලෙන්න කෑ ගහනවද,කී දෙනෙකුටනම්  වලි අදිනවද කියල හිතෙනකොටත් හිතට දැනෙන්නේ හරි දුකක්.පහුගිය දොහේ පුරාවටම අත තියන තියන වැඩේ අල වෙලාගියේ පූරුවේ කරපු අකුසලකර්මයක් හින්දද කියලත් වෙලාවකට හිතෙනවා.

පුංචිකාලේ ගමේ සාපින් මාමගේ කඩෙන් ලෙමන් පෆ් පැකට් එකක් හොරෙන් අරන් මාට්ටු වෙච්චි දා ඉඳල ඔය බිස්කට් ජාතිය එක්ක විමලසිරිගේ තිබුනේ ලොකු ආරෝවක්.අවාසනාවකට ඔය බිස්කට් හදන ෆැක්ටේරිය ලංකාවේ එකක් වෙච්චි කොට ඔය අධිරාජ්‍යවාදී ආයතනවල නිෂ්පාදන  කන්න එපා කියල ගුස්තියක් අල්ලන්න පුළුවන් කමක් තිබ්බෙත් නෑ.අන්තිමේදී තමයි ඕක කාලම තරහ පිරිමහගන්නවා කියල හිතල මාරාන්තික උපවාසයක් පටන් ගත්තේ.උපවාසේ තිබිච්ච පැය තුනට කිලෝ තුනක් ලෙමන් පෆ් කාල තමයි යන්තම් ඒ තරහ අකාමකා ගත්තේ. ඒත් ලෝකයා තමන්ට බත්නොකන මුඛයෙනුත් හිනාවෙනවා කියන එක දැනගත්තු කොට ලෙමන් පෆ් කාපු සන්තෝසේ නැතිවෙලා ගියේ,මේ දැන් විරුද්ධ වෙච්චි දේකට රජතුමා දෙන එක ෆෝන් කෝල් එකෙන් පස්සේ පක්ෂ වෙනවාටත් වඩා ඉක්මනින්.

ඉස්කෝලේ නමේ පන්තියේ ඉන්න වංගියේ  හඳ පායපු රෑක අටේ පන්තියේ හිටපු සමන්මලී  බලන්න ඒ ගෙයි පිළිකන්නේ ටැක් ගැහි ගැහි ඉද්දි සමන්මලීගේ අයියා නන්දනට අහුවෙලා කනේ පාරක් කාපු දා ඉඳලා විමලසිරිගේ හඳ ගැන තියෙන්නෙත් ලොකු ආරෝවක්.පස්සේ කාලෙක අතිජාත මිත්‍රයා ජාගොඩ එක්ක සෙට් වෙච්චි වෙලාවක කිව්වේ දවසක හඳට පොල්ලකින් හරි ගහනවා කියලා දාගත්තු දෙක වැඩිවෙලා හෙම නෙවෙයි ඔන්න .පොඩි කාලේ අහපු පරණ කතාවක් මතක් වෙච්චි ජාගොඩ විමලසිරිට මතක් කරලා දුන්නා හදිස්සියෙවත් හඳට පොලුගහන කොට ගොරක පොල්ලකින් හෙම ගහන්න එපා කියලා.

ඔය අහුඅස්සේ තමයි අර බෑන් කී මූනා කියල හාදයෙක් කරලියට ආවේ.තැටිය රත්වෙච්චි වෙලාවේ රොටිය පුච්ච ගන්න වහාම ඉදිරිපත්වුන වීරයා ඒ මූනා මොකද මේ මූනා මොකද කියලා හිතලා,මේ මූනට පොලුගහන්නයි  ආයෙත් ඉක්මනටම සෙට් උනේ. ඉතින් මහා ජන පෙළපාලියකින් එජා කාර්යාලයට ගොහින් හඳට පොලුගහලා ,කණේ පාර කාපු තරහ යන්තම් අකා මකා ගත්තා.වැඩි දොහක් යන්න ලැබුනේ නෑ මේ නාට්ටියත් වල් උනා වගේ,රටේ තොටේ ඇහෙන කොන්ඩම් කතා වලින් දැනගත්තු විමලසිරි ඉන්තීරුවෙන්ම හිතාගත්තේ මේනම් නරක ග්‍රහ අපලයක්ම තමයි කියලා.කොයි එකටත් කියල කේන්දරේ බලවාගන්න එක හොඳයි කියල නුවණක්‌ කියල දුන්නේ,මීම නාකිඋනත් අඟ නාකි නොවෙන ජේ ආර් පී මාමා.ඉතින් විමලසිරිකොයිකටත් කියල තකහනියක්ම බ්‍රහ්මදත්ත නුවරට ගොහින් කේන්දරේ බලවා ගත්තා. සාත්තර ගුරුන්නාන්සේත් කිව්වේ හිතේ තියන තරහවල් සේරම කොහොමහරි හිරකරගෙන ඉන්නේ නැතිව පිටකරන්න කියලා නොවැ.

ඉතින් ආර්‍යාවගේ ගෝරනාඩු අහගෙන  මහා -ලඹේ තුන්මහල් ප්‍රාසාදයේ මුල්ලකට වෙලා විස්සෝපෙන් ඉන්නගමන් විමලසිරි අතීතයට නුවණ විහිදලාබලන්නේ තව මොනවද තමන්ගේ හිතේ තියන තරහවල් කියලා.ඔහොම “අල්ප දයන්නක්” වගේ වකුටුවෙලා හිටපු මිනිහා හදිසියේම”ඉංගිරිසි එල් අකුර” වගේ කෙලින් වෙලා යුරේකා කියල උඩ පැන්න සද්දෙට මෙච්චරවෙලා ආඩපාලි කියකියාහිටිය ආර්‍යාවත් තක්බීර් වෙලා ගියපි.මේ හදිසියේම මතක්වුන තරහව මොකද්ද බලන්න දුවගෙන ආවේ මුසා,”ඇයි බොසා”කීයාගෙන.ඉස්කෝලේ දහයේ පන්තියේ ඉන්න වන්ගියේ,බෑක්-බෝල් කණ්ඩායමට බැඳෙන්න තිබුන ආසාවයි මේ මතක් වෙලා තියෙන්නේ තකහනියක්ම.විමලසිරි තටු ඇවිත් වගේ පියාඹලා ගියා තමුන් බෑක්-බෝල වලට පෙම් කරපු ඒ සමනල වයසට.ආසාව නිසාම ඉස්සරවෙලාම පිත්තෙන් ගහලා කණ්ඩායමට එන්න බැලුවට එක හරිගියේ නෑ.”ඔයිට වඩා හොඳ පිත්තෙන් හරඹ කාරයෝ ඉන්නවා.”බෑක්-බෝල උගන්වන ගුරුතුමා කිව්වා.බෝලෙන් දමල ගහලා කණ්ඩායමේ තැනක් ගන්න එකත් එච්චරම හරිනොගිය තැන තමයි කඩුල්ල රකින වැඩෙන් ගොඩයන්න බැලුවේ විමලසිරි.

එකනම් ටිකෙන් ටික හරියාගෙන එද්දී අලුත් කඩුලු  රකින හාදයෙක් ආපි ඉස්කෝලෙට.අලුත් මිනිහා පෙන්නපු වැඩ ඉස්සරහ විමලසිරි සෙකන්ඩ් උනේ දවසින් දෙකෙන්.ඉතින් කණ්ඩායමට යන්න ඔන්න මෙන්න ඉන්නකොට වෙච්චි මේ වින්නැහිය හින්දම තමයි ඔය කඩුල්ල රකින උන් ගැන හිතේ තරහව තාමත් තියෙන්නේ.ඔය තරහව මේ අහුඅස්සේ මතකෙට ආවේ සංගක්කාර එංගලන්තේ ගොහින් කතාවක් කලාට පස්සේ.ඉතින් සතියක් දෙකක් සංගක්කාරට වලිය අදින්න අපේ වීරයා ඉවසල හිටියා වෙන කවුරු හරි ඔය වැඩේට මුලපුරනකම්.කවුරුත් මේකට වලියක් අදින්න ලැස්ති නෑ වගේ පේනකොට තමුන්ගේ “චී නිවුස්”එකේ අභීත මාධ්‍යවේදීන් සංගාට බැස්ටිය දෙන වැඩේට යොදවන්නයි අන්තිමේදී තීරණයවුනේ.

ඒ වැඩෙන් පස්සේ උනත් වෙන කිසිම මාධ්‍යයකින් මේක පයිසෙකට ගණන්ගත්තේ නෑ.එහෙම කියලා අතට ගත්තු සටන පණ ගියත් අත අරින මිනිහෙක් නෙවෙයි මේ විමලසිරි. එහෙම කිව්වේ පහුගිය දොහක හවස්කොරේ දෙකක් දාගන්නගමන්  බණ්ඩාර දොස්තරමහත්තයට.ඉතින් කේන්දරේ පිළිවෙලට තවත් මේ තරහවනම් නිවුණේ නැති වෙච්චි මේ වීර පුරුෂය සංගක්කාර ඌ ඇම් පී එකෙන් චන්දෙ ඉල්ලනවා කියලා ආයෙත් සංගාට නෙලන්න පටන් අරන් තියෙන්නේ.මේ වැඩෙත්  වල්වුනොත් එහෙම,බලාපොරොත්තුවන්න ප්‍රේක්ෂක මහජනතාවෙනි,ඊ ළඟ එකනම් නෙලනවා ඇඩ්රස් නැතිවෙන්නම.

කොහොමහරි මේ අපල කාලේ ගෙවාගන්නත්  එපායැ.විමලසිරි කොච්චරනම් සම්පතක්ද අපේ මේ මුතුඇටේට.

චැපල් සහ රන්දිව්

අවුරුදු එකසිය හැට ගණනක් පරණ ක්‍රිකට් ඉතිහාසයේ එතෙක් මෙතෙක් යැවූ ප්‍රසිද්ධම නිපන්දුව කුමක්ද?පසුගිය සතිය වෙනතුරු මෙය උත්තරයක්  නැති ප්‍රශ්නයක් වී තිබුනද දැන්නම් එයට පහසු උත්තරයක් තිබේ.ඒ උත්තරය නිර්මාණය කරදුන් ශ්‍රී ලංකා ක්‍රිකට් පාලක මණ්ඩලය සහ ශ්‍රී ලංකා ක්‍රිකට් නායකයා ඉතිහාසයට එක් කරදුන් ඒ සිදුවීම ගැන අනාගතයේ කෙසේ කල්පනා කරනු ඇතිද?සුරාජ් රන්දිව්ට අනාගතයේ ඉන්දියාවේ  ක්‍රීඩා කිරීමේදී ඇතිවන්නාවූ නියත දුෂ්කරතා ඔවුන්ට තමන් ගත්තාවූ අමන තීරණය නැවත නැවත මතක් කරනු ඇත.

1981 පෙබරවාරි පළමුදා ක්‍රිකට් ක්‍රීඩාවේ ඉතිහාසයට කළු පැල්ලමක් එකතු කල දිනයකි,එදා තරග 5 ක එක්දින තරගාවලියේ 3 වන තරගයට ක්‍රීඩා කරමින් පන්දුවට පහරදෙමින් සිටි නවසීලන්ත අංක 10 පිතිකරු බ්‍රයන් මැකෙච්නි හට ඕස්ට්‍රේලියානු පන්දු යවන්නා වන ට්‍රෙවර් චැපල්අත යටින් පන්දුවක් යැවූ නින්දිත සිදුවීම සිදුවූ දිනයයි.අවසාන පන්දුවට ලකුණු 6 ක් ලබා ගත්තේනම් එදා කිවි-කැන්ගරු හටන සම වෙන්නට තිබිණ.එහෙත් තම වැඩිමහල් සොහොයුරා සහ එවකට ඕස්ට්‍රේලියානු නායකයා වූ ග්‍රෙග් චැපල්ගේ උපදෙස් පරිදි ට්‍රෙවර් චැපල් යැවූ අතයට පන්දුව කැන්ගරුවන්ට ජය ලබා දිනි.තරගයේ එම මොහොතේ විස්තර විචාරය කරමින් සිටි මේ දෙදෙනාගේ වැඩිමහල් සොයුරා ඉයන් චැපල් වහා පැවසුවේ මෙය අතිශයින්ම සිදු නොවිය යුතු ක්‍රියාවක් බවයි.

කොයි හැටි වෙතත් එවකට නීති පොතේ මෙය පිටුදැකීමට වගන්ති අඩංගු නොවූ හෙයින් එය එක සිදුවීමක් පමණක්ම ලෙස අවසන් විණි.ට්‍රෙවර් චැපල් මාධ්‍යයන්ගෙන් විමසුවේ  තමා මෙතෙක් එක්දින තරගවලදී පන්දු 736 ක් යවා ඇති බවත් අනෙක් පන්දු 735 පිලිබඳ කිසිවෙක් විමසන්නේ නැත්තේ මන්ද යන්නත්ය.පසුගියදා  mid-day.com නම් වෙබ් අඩවිය ට්‍රෙවර් චැපල්ගෙන් රන්දිව් පිලිබඳ විමසූ පුවතක් පල කර තිබිණි.ඔහු රන්දිව්ට දෙන උපදෙස වන්නේ මීළඟ තරගයත් තවත් තරගයක් ලෙස සිතන ලෙසයි.තවද තමන් වෙනත් ක්‍රීඩකයන්ගේ සහ ප්‍රේක්ෂකයන්ගේ ප්‍රතිචාර ඇඟට නොගන්න තුරු ඔවුන්ට තමන් වෙත බලපෑමක් කල නොහැකි බවද චැපල් පවසයි.2005 වසරේදී ඕක්ලන්ඩ්හිදී පැවැති කිවි-කැන්ගරු 20-20 ක්‍රිකට් තරඟයක අවසාන පන්දුවාරයේ අදාළ සිදුවීම සිහිපත් කරමින් ග්ලෙන් මැක්ග්‍රාත් විසින් කයිල් මිල්ස් හට අතයට පන්දුවක් යවන ලදී.එවිට විනිසුරුව සිටි බිලී බව්ඩන් විසින් මැක්ග්‍රාත්ට රතු කාඩ් පතක්පෙන්වීය.මේ අද ඒ අතයට පන්දුව සිනහවෙන් සිහිගන්වන ආකාරයයි.

දැන් නැවත රන්දිව්ගේ නිපන්දුව ගැන කතා කරමු.එම පන්දුව චැපල්ගේ අතයට පන්දුවට වඩා නරක වන්නේ කෙසේද?එය චැපල්ගේ සිදුවීම මෙන් තවත් එක සිදුවීමක් පමණක්ම නොවෙන්නේ ඇයි?මෙයට දිය යුතු පිළිතුර වන්නේ ක්‍රිකට් පාලක මණ්ඩලයේ නිවට නියාලු පිළිවෙත නිසා බවයි.සංගක්කාර දක්ෂ නායකයෙක් බව අවිවාදිත වුවත්,අර්ජුන මෙන් කොන්දක් ඇති නායකයෙක් නොවන නිසා බවයි.මුරලිට ඩැරල් හෙයාර් පන්දුව දමා ගැසීමේ චෝදනා කරද්දී අර්ජුන දැක්වූ ශක්තිමත්භාවයෙන් සියයට දහයක් සංගාට හිමිවිනිනම් මෙය මෙතරම් කතා කරන මාතෘකාවක් නොවන්නේය.ෂෙවාග් මොනතරම් ඇඩුවත් සංගාට එය තවත් එක නිපන්දුවක් කියා කරබාගෙන නොසිට ,රන්දිව් හොරායැයි ලෝකයට කියන්නට උවමනා වෙන්නේ තම ක්‍රීඩකයන් රැක ගැනීමට අවශ්‍යතාවය නැති නිසාම විය නොහේ.ඇතැම් විටෙක අයි.පී.එල්.සල්ලි මල්ලේ වටිනාකම රන්දිව්ට වඩා වැඩි නිසා විය යුතුයි.

අනෙක් අතට මෙය සිදුවුයේ හර්බජාන් සිං අතින්නම් ඉන්දියානු ප්‍රතිචාරය කිසිවිට මේ ආකාරයට වෙන්නේ නැත.ඔවුන් කිසි දිනෙක එය හිතාමතා යැවූ පන්දුවක් ලෙස පිලි නොගන්නවා පමණක් නොව අර සංගක්කාර බෝක්කුව යැවූ පන්දුවට පසු පළමු පන්දුවම නිපන්දුවක් ලෙස යවනු ඇත.නිවට ක්‍රිකට් පාලක මණ්ඩලයද ඉන්දියානු ලොකු අයියාට බියෙන් මුනිවත රකිනු නොඅනුමානය.

මෙතරම් පහසුවෙන් සාමාන්‍ය නිපන්දුවක් ලෙස සළකා බැහැර කල හැකිව තිබූ සිදුවීම ඉල්ලගෙන කා ගැනීමක් කරගන්නේ ඊයේ පමණක් නොව අදද ලංකාවට සිදුවෙමින් පවතින ඉන්දියානු බලපෑමයි.අනෙකුත් වෙනත් කාර්යයන්වලදී මෙතෙක් පැවැති ඒ බලපෑම අද ක්‍රීඩාවටද බැල්ම හෙලා තිබීම ඉතා නරක ලකුණකි.පාලක මණ්ඩලයද ඉන්දියානු පැත්ත ගැනීම ක්‍රීඩකයන්ට කිසිදු සරණක් අහිමි කළේය.ඉතින් ඇස් පනා පිට මෙතරම් මුදල් උපයන ක්‍රිකට් පාලක මණ්ඩලය,පාඩු පිට දුවන ආයතනයක් බවට පත්වීමේ අරුමය,නිකන්ම නිකන් කරුමයක්ම නොවේ.

ලිපියේ මුලම සදහන් කල පරිදි රන්දිව් ඉන්දියාවේදී පන්දු යවන විට ක්‍රිකට් වෙනුවෙන් මරාගෙන මැරෙන සහ,ආකල්ප අතින් නොදියුණු ඉන්දීය ප්‍රේක්ෂකයන් නෝ බෝල් යැයි කෑගසද්දී පාලක මණ්ඩලයේ මහත්වරුන්ට සිදුවන්නේ කන්දෙකේ ඇගිලි ගසා ගැනීම පමණකි.මුරලිගෙන් පසුව අනාගතයේ ලෝකයට තර්ජනයක් වෙතැයි අනුමාන කළහැකි රන්දිව්ට කෙනෙහිලි කිරීමට ඔස්ට්‍රේලියාව ප්‍රමුඛ කල්ලියටද අපිම නැති අවස්ථා මවාදී තිබේ.

අවසාන වශයෙන් කල හැක්කේ ප්‍රාර්ථනාවක් පමණකි.මේ සිදුවීමෙන් රන්දිව්ගේ ක්‍රීඩා අනාගතය අඳුරු නොවේවා යන්නයි.රන්දිව්ටද ගතහැකි එකම පාඩම වන්නේ තමන් වැරැද්දට පොළඹවන ලොක්කන් වැරදුනදා අනික් පැත්ත ගසන බවයි.